Əhli-Beyt (əleyhimus səlam) – Beynəlxalq Xəbər Agentliyi- ABNA: Ümüdünya Müsəlmanalrının Ali Lideri və İslam İnqilabının Ali Məqamlı Rəhbəri hicri 1404-cü ilin başlanğıcı ilə bağlı Novruz Bayramı müraciətində yeni ili “İstehsal üçün sərmayə” ili adlandırıb.
Həzrət Ayətullah Xamenei Novruzun-Yeni ilin başlanğıcının Qədr gecələri və Əmirəl-möminin Həzrət İmam Əlinin (əleyhi səlam) şəhadət günləri ilə eyni vaxta düşməsinə işarə edərək, ümidvar olduğunu bildirib ki, Qədr gecələrinin bərəkəti və Mövləl Müttəqin həzrəti Əlinin inayəti əziz İran xalqına və Yeni ilinin Novruz bayramı ilə başlayan bütün insanlara çatacaqdır.
O, 1403-cü Hicri Şəmsi ilini 1360-cı illərin hadisələrinə bənzər ardıcıl hadisələrlə dolu, xalq üçün məşəqqət və çətinliklərlə müşayiət olunan bir il hesab edərək buyurublar:
“Ötən il bir sıra iranlı müşavirlərin Dəməşqdə şəhadəti, daha sonra İran xalqının sevimli prezidenti cənab Rəisinin şəhadəti və ondan sonra Tehran və Livanda baş verən acı hadisələr İran xalqının və İslam ümmətinin dəyərli şəxsiyyətlərinin itirməsinə səbəb oldu.”
İslam İnqilabının Rəhbəri 1403-cü ildə baş verən digər hadisələr arasında xüsusilə ilin ikinci yarısında baş verən iqtisadi problemlərin və dolanışıq çətinliklərinin təzyiqini sadalayaraq qeyd etdilər:
“Bu problemlər qarşısında böyük və qəribə bir fenomen ortaya çıxdı: İran xalqının iradəsinin gücü və mənəvi ruhu, onun yüksək səviyyəli birliyi və hazırlığı özünü büruzə verdi. Onun ilk təzahürü prezidentin itirilməsi və bu böyük itki qarşısında o nəhəng dəfn mərasimində xalqın səsləndirdiyi şüarları və yüksək əhval-ruhiyyəsi oldu ki, bu da ağır bəlanın xalqda zəiflik hissi yaratmağa qadir olmadığını bir daha göstərdi.”
İmam Xamenei həzrətləri, bu ağır itkidən dərhal sonra prezident seçkilərinin qanuni müddət ərzində sürətlə keçirilməsini, prezident seçmək və hökumət qurmaqla ölkənin idarəçilik boşluğundan çıxarılmasını iranlıların yüksək mənəviyyatının və mənəvi qabiliyyətinin növbəti təzahürü adlandırıb və millətin mənəvi-əxlaqi gücünün təzahürünün başqa bir sahəsini səciyyələndirərək buyurublar:
“Livan və Fələstin xalqlarının problemləri ilə üzləşən İran xalqı böyük səxavətlə Livan və Fələstindəki din qardaşlarına böyük bir ictimai yardım göndərdi.”
Ayətullah Xamenei həzrətləri Müqavimətə xalqın heyrətamiz töhfələrini, xüsusən də iranlı qadınların səxavətli qızıl ianəsini ölkə tarixində qalıcı və unudulmaz hadisələrdən hesab edib və vurğulayıblar:
“Milli iradə və qətiyyətin gücü, xalqın hazırlığı və mənəvi gücü əziz İranın gələcəyi və əbədiyyəti üçün dəyərli sərvətdir və Allahın bu ölkəyə olan lütfünün davam etməsinə səbəbdir.”
İslam İnqilabının Rəhbəri Novruz mesajının başqa bir hissəsində 1403-cü ilin “xalqın iştirakı ilə istehsalatda sıçrayış” adlandırılmasına toxunaraq, hökumətin, xalqın və özəl sektorun səylərinə baxmayaraq, ötən il baş verən hadisələrin bu şüarın tam reallaşmasına mane olduğunu bildirib və əlavə ediblər:
“Ona görə də bu il əsas şüar və məsələ yenə də iqtisadi və investisiyaya yönəlib, çünki istehsalın sıçrayışı və dolanışıq problemlərinin həlli istehsala investisiyanın reallaşdırılmasından asılıdır.”
Ümüdünya Müsəlmanlarının Ali Rəhbəri, xalqın istehsal sahəsinə sərmayə qoyması üçün şəraitin yaradılmasında hökumətin rolunu vurğulayaraq deyiblər:
“Təbii ki, insanların sərmayə qoymağa motivasiyası və imkanı olmayan yerdə hökumət işə qarışıb, xalqa rəqib kimi deyil, alternativ kimi sərmayə qoya bilər.”
Həzrət Ayətullah Xamenei sərmayəni istehsalda reallaşdırmaq üçün hökumətdə və xalqda ciddi əzm və motivasiya yaratmağı zəruri hesab edərək bildiriblər:
“Hökumətin işi zəmin yaratmaq və istehsala mane olanları aradan qaldırmaqdır, xalqın işi isə kiçik və böyük sərmayələrini istehsala yatırmaqdır ki, belə olan halda kapital artıq valyuta və qızıl kimi zərərli şeylərə doğru getməyəcək. Və bu məsələdə mərkəzi bank və hökumətin effektiv rolu var.”
İnqilab Rəhbəri bu müqəddimə ilə 1404-cü ilin şüarını “İstehsal üçün sərmayə” adlandırdı və ümidvar olduğunu bildirdi ki, dövlətin planlanları və xalqın iştirakı ilə məişət və dolanışıq məsələlərində bir yol açılacaqdır.
İmam Xamenei çıxışının yekun hissəsində qəsbkar sionist rejimin Qəzzəyə yenidən təcavüzünü çox böyük və fəlakətli cinayət adlandıraraq vurğulayıblar:
“Bu məsələ İslam ümmətinin məsələsidir, ona görə də bütün ümmət öz ixtilaflarını bir kənara qoyub bu cinayətlərə qarşı həmrəy olmalıdır. Həmçinin, Avropa və Amerika da daxil olmaqla, dünyanın bütün azad insanları bu xain və fəlakətli hərəkətə qarşı durmalı və davamlı olaraq körpələrin öldürülməsinin, yaşayış massivlərinin dağıdılmasının, insanların didərgin salınmasının qarşısını almalıdırlar.”
Ali Rəhbər, Amerikanın bu fəlakətə görə məsuliyyət daşıdığını və siyasi ekspertlərin fikrincə, bu cinayətin Amerikanın sifarişi və ya ən azı onun razılığı ilə törədildiyini vurğulayaraq, bildiriblər:
“Yəmən hadisələri və Yəmən xalqına və dinc əhaliyə qarşı hücumlar da başqa bir cinayətdir ki, bunun qarşısı mütləq alınmalıdır.”
İnqilab Rəhbəri çıxışını İslam ümmətinə xeyir, firavanlıq və qələbə arzuları ilə yekunlaşdırdı. Və həmçinin ümidvar olduqlarını bildirdi ki, İran xalqının səadəti, razılığı, uğuru və tam birliyi ilin sonuna qədər davam edəcək və İmam Zaman (ə) həzrətlərinin pak qəlbi, Ali Məqamlı İmam Xomeyni cənablarının və şəhidlərin pak ruhları İran xalqından razı və sevincək qalacaqlar.
Sizin rəyiniz