27 mart 2022 - 17:16
Xocalının Fərrux kəndi Azərbaycanın nəzarəti altına keçdi, Rusiya buna etiraz etdi...

Azərbaycan Müdafiə Nazirliyi isə Rusiya Müdafiə Nazirliyinin bu açıqlamasını ikitərəfli əlaqələrin mahiyyətinə və bu ilin fevralında imzalanmış müttəfiqlik qarşılıqlı fəaliyyəti haqqında Bəyannaməyə "zidd" hesab edib.

Əhli-Beyt (əleyhimus səlam) – Xəbər Agentliyi ABNA-nın verdiyi məlumata əsasən, Azərbaycan Respublikasının Xocalı rayonunun Pirlər kənd inzibati ərazisinə daxil olan Fərrux kəndi Azərbaycan Ordusu tərəfindən azad edilərək Azərbaycanın nəzarəti altına keçib.

Rusiya Müdafiə Nazirliyi Azərbaycan Silahlı Qüvvələrinin Fərrux kəndi istiqamətində mövqelərini möhkəmləndirmələrindən narahatlığını ifadə edən açıqlama yayıb.

Açıqlamada iddia olunub ki, Azərbaycan “martın 24-dən 25-dək Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub”.

Azərbaycan Müdafiə Nazirliyi isə Rusiya Müdafiə Nazirliyinin bu açıqlamasını ikitərəfli əlaqələrin mahiyyətinə və bu ilin fevralında imzalanmış müttəfiqlik qarşılıqlı fəaliyyəti haqqında Bəyannaməyə "zidd" hesab edib.

Azərbaycan Müdafiə Nazirliyi açıqlayıb ki, Azərbaycan Ordusunun bölmələri mövqelərin və dislokasiya məntəqələrinin yerlərinin dəqiqləşdirilməsi prosesini davam etdirir və bu zaman "güc tətbiq etmir".

Azərbaycanın 2020-ci il 10 noyabr üçtərəfli bəyanatına sadiq olduğunu, onun heç bir müddəasını pozmadığını bildirən Müdafiə Nazirliyi bu bəyanatın 4-cü bəndinə əsasən Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən "tam olaraq çıxarılmasının indiyə qədər icra edilməməsinə" görə Ermənistanı ittiham edib.

Bundan əvvəl Ermənistan da Azərbaycanı 10 noyabr bəyanatının müddəalarını "pozmaqda" ittiham etmişdi.

Qeyd etmək yerinə düşər ki, Rusiya sülhməramlılarının hazırkı mandatı qeyri-müəyyəndir. Rusiya MN-in iddialarının əksini sübut edən onlarla görüntü və video çəkiliş, mediada yayılan xəbərlərlə sübut etmək olar ki, məhz Rusiya sülhməramlıları özləri 10 noyabr razılaşmasının müddəalarına əməl etmirlər. Çünki üçtərəfli bəyanatın 4-cü bəndinə əsasən, qanunsuz erməni birləşmələri çoxdan ərazidən çıxarılmalı idi.

Rusiya sülhməramlılarının davranışı, eləcə də Rusiya mediasının hələ də terrorçuları "respublika" kimi təqdim etməsi, rəsmi medianın terrorçu Araikin "sərəncamlarını" tirajlaması 22 fevralda imzalanmış müttəfiqlik münasibətləri haqda bəyanata zidd hərəkətlərdir. Elə bu müqavilənin də separatizmə qarşı mübarizəni ehtiva edən müddəaları kobud şəkildə pozulur.

 

 

Diqqət: Xəbərdən İstifadə Etdikdə Mənbəyə İstinad Lazımdır!