Ə Əhli-Beyt (əleyhimus səlam) – Beynəlxalq Xəbər Agentliyi- ABNA: ABŞ mediası bildirib ki, ABŞ Silahlı Qüvvələrinin Birləşmiş Qərargah Rəisi qapalı görüşlərdə İranla müharibədən çıxış yolu tapılmasını istəyib və münaqişənin genişləndirilməsi üçün mövcud variantların Vaşinqtonun məqsədlərinə çatmağa kömək etməyəcəyi, əksinə, əks nəticələrə səbəb ola biləcəyi barədə xəbərdarlıq edib.
CNN üç məlumatlı mənbəyə istinadən xəbər verib ki, ABŞ Birləşmiş Qərargah Rəisi Dan Kain son həftələrdə Donald Tramp administrasiyasının yüksək səviyyəli rəsmiləri ilə keçirdiyi qapalı görüşlərdə ABŞ-ın İranla müharibədən çıxması üçün bir yol tapmasının vacibliyini vurğulayıb.
Mənbələrdən birinin sözlərinə görə, “Kain çıxış yolu axtarır.”
CNN yazıb ki, ABŞ Birləşmiş Qərargah Rəisi müharibənin genişləndirilməsinin mümkün nəticələri və hərbi variantların məhdudluğu ilə bağlı narahatlıqlarını ABŞ Mərkəzi Kəşfiyyat İdarəsinin (CIA) direktoru Con Retkliff, dövlət katibi Marko Rubio və vitse-prezident Cey Di Venslə də bölüşüb.
Məlumata görə, Kain bu rəsmilərlə koordinasiya görüşlərində Tramp ilə görüşdən əvvəl mövcud hərbi variantların, o cümlədən quru qoşunlarının göndərilməsini tələb etməyən variantların məhdudiyyətləri və riskləri barədə ümumi mövqeyə gəlməyə çalışıb.
Mənbələrdən biri CNN-ə bildirib ki, Kainin bu məsləhətləşmələrdə əsas məqsədi ABŞ Silahlı Qüvvələrini qorumaq olub.
Hesabatda qeyd olunur ki, Tramp hələ də İrana quru qoşunlarının göndərilməsinə qarşıdır və hava hücumlarının Tehranın Vaşinqtonun tələblərinə uyğun razılaşmanı qəbul etməsinə səbəb ola biləcəyini düşünür. Lakin Kain və ABŞ hökumətinin bir sıra digər rəsmiləri qapalı görüşlərdə bu ssenarini ehtimalolunmaz hesab edir və prezidentin müəyyən etdiyi çərçivəyə uyğun başqa variantlar axtarırlar.
CNN yazıb ki, müharibənin başlamasından təxminən altı ay sonra, Tramp İranın nüvə silahına sahib olmasının qarşısını almaq kimi bəyan etdiyi məqsədini hələ də vurğuladığı bir vaxtda, ABŞ-ın ən yüksək səviyyəli hərbi rəsmisi qapalı müzakirələrdə müharibəni sona çatdırmaq üçün asan hərbi həll yolunun olmadığını bildirir.
CNN öz mənbələrinə istinadən yazıb ki, Tramp administrasiyasının bir çox yüksək səviyyəli milli təhlükəsizlik rəsmisi kəşfiyyat qiymətləndirmələrinə, hərbi prinsiplərə və praktiki təcrübəyə əsaslanaraq “hava qüvvələrinin öz məhdudiyyətləri var” qənaətinə gəlib. Kain də ötən ayın sonunda Konqresdə keçirilən dinləmədə bu ifadəni işlədib.
Mənbələrdən birinin sözlərinə görə, məhz bu narahatlıqlar Kain və digər hökumət rəsmilərinin iyulun sonunda İrana qarşı daha genişmiqyaslı hücumlar planına ehtiyatla yanaşmasına səbəb olub. Onlar müharibənin daha da genişlənməsinin gözlənilməz nəticələr doğura biləcəyindən ehtiyat ediblər.
Mənbə əlavə edib ki, ABŞ ordusunun Mərkəzi Komandanlığının (CENTCOM) yalnız bir hissəsi bu əməliyyatların həyata keçirilməsini dəstəkləyib, İsrail rejimi isə ümumilikdə münaqişənin daha da genişləndirilməsini dəstəkləyib.
CNN ABŞ hökumətinin yüksək səviyyəli rəsmisinə istinadən yazıb ki, Tramp regional müttəfiqləri ilə danışdıqdan sonra bu hücumların həyata keçirilməsindən geri çəkilib. Çünki həmin ölkələr İranın cavab hücumlarından, xüsusilə də öz enerji infrastrukturlarına qarşı mümkün zərbələrdən narahat olduqlarını bildiriblər.
Hesabatda həmçinin ABŞ-ın sursat ehtiyatlarının azalmasının da bu qərara təsir edən amillərdən biri olduğu vurğulanır. Mənbələrin sözlərinə görə, Fars körfəzi ölkələrinin rəsmiləri də ABŞ hökumətinə xəbərdarlıq ediblər ki, ABŞ-ın qabaqcıl hava hücumundan müdafiə sistemlərinin azalması onların mümkün İran hücumlarına qarşı müdafiə imkanlarını zəiflədəcək.
İranın infrastrukturuna hücumun nəticələri barədə xəbərdarlıq
CNN xəbər verib ki, Tramp dəfələrlə İranın enerji infrastrukturunu hədəfə alacağı ilə hədələyib. Lakin məlumatlı mənbələr hesab edirlər ki, belə bir addım nə İranı geri çəkilməyə məcbur edəcək, nə də Vaşinqtonun məqsədlərinə nail olmasına imkan verəcək. Əksinə, bunun böyük ehtimalla İranın Fars körfəzi ölkələrinin enerji obyektlərinə qarşı cavab hücumlarına səbəb olacağı düşünülür.
Mənbələr həmçinin bildiriblər ki, Tramp körpülərə hücum variantını da nəzərdən keçirib. Lakin bu addımın da effektiv strateji nəticə verməyəcəyi və hücum üçün əhəmiyyətli digər hərbi hədəflərin artıq qalmadığı qənaətinə gəlinib.
Sursat çatışmazlığı komandirlərin ortaq narahatlığıdır
CNN yazıb ki, Kain hətta müharibə başlamazdan əvvəl Trampa xəbərdarlıq etmişdi: uzunmüddətli münaqişə ABŞ-ın silah ehtiyatlarını, xüsusilə İsrail rejiminə və Ukraynaya dəstək məqsədilə istifadə olunan sursatları ciddi şəkildə azaldacaq.
Bu xəbər şəbəkəsinin mənbələrinin sözlərinə görə, ABŞ ordusunun yüksək rütbəli komandirləri hazırda sursat ehtiyatlarının “təhlükəli mərhələyə” çatdığını düşünürlər.
Məlumata görə, məhz bu vəziyyət Pentaqon və ABŞ ordusunun Mərkəzi Komandanlığını (CENTCOM) son həftələrdə hərbi strategiyasına yenidən baxmağa vadar edib. Hətta CENTCOM-un yüksək rütbəli komandirlərindən biri daxili məktub göndərərək hərbçilərdən İrana təzyiqi artırmaq üçün “yaradıcı və qeyri-ənənəvi” təkliflər irəli sürmələrini istəyib.
CNN-ə danışan məlumatlı mənbələrdən biri bildirib ki, ABŞ ordusunun müharibənin başlamasından altı ay sonra İrana təzyiq göstərmək üçün yeni ideyalar axtarması dolayısı ilə müharibənin gözlənildiyi kimi getmədiyini göstərir.
Simvolik qələbəyə fokuslanma
CNN reportajının sonunda bildirib ki, ABŞ hökumətindəki bir çox rəsmi şəxs və analitik Amerikanın məqsədlərini həyata keçirməsinin yeganə yolunun İranda genişmiqyaslı quru əməliyyatı olduğunu düşünür. Lakin Tramp administrasiyasının heç bir rəsmisi belə bir variantı dəstəkləmir. Çünki bu, minlərlə amerikalı hərbçinin öldürülməsi ilə nəticələnə bilər.
Amerika mediasının məlumatına görə, bunun nəticəsində hazırda ABŞ-ın yüksək səviyyəli rəsmiləri üçün əsas diqqət Trampa ən azı “simvolik qələbə” qazandıra biləcək çıxış yolu tapmağa yönəlib. Bu, Trampa həmin qələbəni ABŞ ictimaiyyətinə təqdim etməyə imkan verməli və eyni zamanda diplomatik prosesin, o cümlədən Hörmüz boğazının yenidən açılması ilə bağlı razılaşmanın əldə olunması istiqamətində danışıqların davam etdirilməsinə mane olmamalıdır.
Sizin rəyiniz