Nazirliyin bəyanatında deyilir: “Azərbaycan Baş Prokurorluğunun dərhal yalan ittihamlar yayması bu əməliyyatın əvvəlcədən təfərrüatlı şəkildə planlaşdırıldığını göstərir. Bundan başqa, mesajda eyni yanaşmanın Dağlıq Qarabağın digər sakinlərinə də tətbiq edilməsi ilə bağlı açıq təhdid var: Azərbaycanın bu təcrübəsi beynəlxalq humanitar hüququn kobud şəkildə pozulmasıdır”.
Ermənistan XİN həmçinin beynəlxalq tərəfdaşları bu və digər oxşar bəyanatları pisləməyə çağırıb, qeyd edib ki, Ermənistan tərəfindən uzun müddətdir qaldırılan etnik təmizləmə həyəcanları mövcud etnik təhdidlərin ciddiliyini əks etdirir.
Bu arada İrəvanda nümayişçilər bu gün Beynəlxalq Qızıl Xaç Təşkilatının ofisi qarşısında etiraz aksiyası keçiriblər.
Onlar Laçın Sərhəd Buraxılış Məntəqəsində keçmiş yaraqlının həbsinə etiraz əlaməti olaraq komitənin Ermənistan nümayəndəliyinin girişini bağlayıblar.
Erməni nümayişçilər Azərbaycanın hərəkətlərinin hərbi cinayətə bərabər olduğunu iddia ediblər.
Rəsmi Bakı isə bildirir ki, Azərbaycan sərhədçiləri “Laçın” sərhəd-buraxılış məntəqəsində Birinci Qarabağ müharibəsində Ermənistanın etnik təmizləmə siyasətinin icraçılarından biri olmuş şəxsi - Vaqif Xaçaturyanı saxlayıblar.
Baş Prokurorluğun məlumatına əsasən, Xaçaturyan 22 dekabr 1991-ci il tarixdə Xocalı rayonunun Meşəli kəndində Azərbaycan milliyyətindən olan şəxslərin soyqırımını, deportasiyasını həyata keçirib, kənd sakinləri və dövlətə məxsus çoxsaylı əmlakı məhv edib.
Xaçaturyan Azərbaycan Cinayət Məcəlləsinin 103-cü (Soyqırımı) və 107-ci (Əhalini deportasiya etmə və ya məcburi köçürmə) maddələrilə təqsirləndirilir.