Əhli-Beyt xəbər agentlikinin verdiyi xəbərə əsasən: Bu gün Müsavat Partiyası Divanının növbəti toplantısı keçirilib. Gündəlikdə qərarların icrası, görülən işlər, partiyadaxili və ictimai-siyasi vəziyyət dair məsələlərə baxılıb. Gündəliyin partiyadaxili məsələ bölümündə əsas müzakirə Müsavat Partiyasının 100 illiyi ilə bağlı olub. Qeyd edilib ki, bu məqsədlə yaradılmış geniş tərkibli təşkilat komitəsinin hazırladığı yubiley tədbirlərinin həyata keçirilməsi yönündə tezliklə konkret addımlar atılacaq.
Partiyanın qurultayına hazırlıqla bağlı da məsələ müzakirə
edilib. Bu həftə ərzində qurultaya hazırlıq üzrə təşkilat komitəsinin
toplantısı keçiriləcək, həmin toplantıda iş bölgüsü aparılacaq və qurultaya hazırlıq çərçivəsində
görüləsi işlər müəyyənləşdiriləcək.
İctimai-siyasi vəziyyətə dair bölümdə başqan İsa Qəmbər
İctimai Palatanın Koordinasiya Şurasının
ilk toplantısı haqqında məlumat verib.
Azərbaycan İslam Partiyasının (AİP) sədri Mövsüm Səmədov və
Azərbaycan Milli Dövlətçilik Partiyasının (AMDP) sədri Nemət Pənahlının həbs olunmaları haqda da müzakirələr
aparılıb. Divan hesab edib ki, onların həbs olunmalarının elan olunmuş rəsmi
ittihamla əlaqəsi inandırıcı deyil. Həmin
şəxslər son zamanlar mətbuatda və bir
sıra tədbirlərdə iqtidar əleyhinə söylədikləri kəskin tənqidlərə görə həbs
ediliblər. Müsavat Partiyası hakimiyyətdən tənqidlərə dözümlü yanaşılmasın, repressiyalara son qoyulmasını və həbs
olunanların dərhal azad edilməsini tələb edib.
Divan Tehran-Urmiya reysini həyata keçirən “Boeing-727” təyyarəsinin Cənubi Azərbaycanın Urmiya şəhərində qəzaya uğraması nəticəsində həlak olanların ailə üzvlərinə, yaxınlarına başsağlığı verib və yaralılara şəfa diləyib.
Sonda cari məsələlərə baxılıb.
