Мүдафиә Назирлијинин мәлуматында билдирилир ки, мајын 11-дән 12-нә кечән ҝеҹә Азәрбајҹан-Ермәнистан шәрти сәрһәдинин Басаркечәр рајонунун Зод јашајыш мәнтәгәси истигамәтиндә нисби сакитлик һөкм сүрсә дә өтән сутка әрзиндә Ермәнистан силаһлы гүввәләри тәрәфиндән Азәрбајҹанын диҝәр истигамәтләрдә јерләшән мөвгеләри үмумиликдә 17 дәфә атәшә тутулуб.
Мәлуматда Азәрбајҹан ордусунун мөвгеләринин Азәрбајҹан Республикасынын Русија Сүлһмәрамлыларынын нәзарәтиндә олан әразиләриндән дә 9 дәфә атәшә тутулдуғу дејилир.
“Русија сүлһмәрамлы гүввәләринин мүвәггәти јерләшдији Азәрбајҹан әразисиндәки гејри-гануни ермәни силаһлы дәстәсинин үзвләри тәрәфиндән Азәрбајҹан Ордусунун Тәртәр, Хоҹалы, Шуша вә Лачын рајонлары истигамәтләриндә јерләшән мөвгеләри мүхтәлиф чаплы атыҹы силаһлардан фасиләләрлә 9 дәфә атәшә тутулуб”,- мәлуматда дејилир.
АБШ Дөвләт Департаментинин мәтбуат катибинин мүавини Ведант Пател тоггушмаларын давамлы вә ләјагәтли сүлһә доғру әлдә едилән тәрәггијә хәләл ҝәтирдијини билдириб.
Русија президентинин мәтбуат катиби Дмитри Песков да дүнән Зод бөлҝәсиндә ҝедән тоггушмалара мүнасибәт билдирәркән белә демишди:
"Әлбәттә ки, биз тәрәфләрдән тәмкинли јанашма ҝөзләјирик вә ҝәрҝинлијин артмасына сәбәб ола биләҹәк һәр һансы һәрәкәтдән чәкинмәјә чағырырыг".
Дүнән зодда ҝедән тоггушмаларда Азәрбајҹан Республикасынын бир әсҝәри һәјатыны итирди. Ермәнистан тәрәфиндән исә 4 әсҝәрин јараландығы билдирилир.
342/
