Əhli Beyt -ABNA- xəbər agentliyinin verdiyi xəbərə əsasən FaktXeber.com-a həbsdə olan AİP funksioneri Rufulla Axundzadənin vəkili Anar Qasımlı deyib: “Rufulla Axundzadənin səhhətində problemlər var. Onun ürək ağrısından və bədəninə su yığılmasından şikayəti var. Lakin Vaqif Abdullayevin məlum ölümündən sonra o, Pentensiar Xidmətin Müalicə Müəssisəsində müalicə almaqdan ehtiyat edir.”
Vəkil onu da qeyd etdi ki, Rufulla Axundzadənin müalicəsi ilə bağlı xaricdən həkim gətirmək üçün müraciət edəcəklər. “AİP funksioneri tamamilə informasiya blokadasına alınıb. Belə ki, ona hər hansı bir qəzetin və ya jurnalın verilməsinə icazə verilmir.”
Qeyd edək ki, AİP lideri Mövsüm Səmədov partiyanın baş məclisində hakimiyyətin əleyhinə tənqidi fikirlər səsləndirdikdən sonra AİP-in digər üzvləri ilə yanaşı uzun müddətli azadlıqdan məhrum olunub. Artıq həbs edilən 5 AİP funksionerindən biri Vaqif Abdullayev bir neçə gün bundan öncə həbsxanada dünyasını dəyişib.
Əsassız ittihamlarla həbs olunan İslam Partiyasının sədri Mövsüm Səmədov 12 il, müavini Vaqif Abdullayev 11 il, Rufulla Axundzadə 11 il 6 ay, Firdovsi Məmmədrzayev 10 il, Dəyanət Səmədov 10 il, Fəramiz Abbasov 11 il müddətinə azadlıqdan məhrum ediliblər. Zülfüqar Mikayılov isə 5 il sınaq müddətilə, 11 illik şərti cəzaya məhkum olunub.
Diqqət: Xəbərdən istifadə etdikdə mənbəyə istinad lazımdır
