Əhli Beyt (əleyhimus səlam) -ABNA- Xəbər Agentliyinin verdiyi xəbərə əsasən Hicab Məhbus, Ruhani Abgül Süleymanov medianın suallarını cavablandırıb.
2011-ci ilin avqust ayında mövcud əliyevlər rejimi tərəfindən ŞƏRLƏNƏRƏK həbs olunan Abgül Süleymanov Bakı Ağır Cinayətlər Məhkəməsinin çıxardığı hökmlə 11 il müddətinə azadlıqdan məhrum edilib. O, QONDARMA milli, irqi, sosial və ya dini nifrət və düşmənçiliyin salınması, ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə, narkotik və odlu silah saxlama ittihamları ilə təqsirli bilinib. Ruhani Bakının Buta qəsəbəsindəki 13 saylı Cəzaçəkmə Müəssisəsində saxlanır.
- Səhhətiniz necədir?
- Allaha şükurlər olsun, səhhətim yaxşıdır, şikayətim yoxdur. Amma yaxınlarımla görüşməkdə çətinlik yaradılır. Saxlandığım cəzaçəkmə müəssisəsinə gələn yolun nə vəziyyətdə olduğunu çoxları bilir. Aprelin 28-nə görüş təyin edilmişdi, yaxınlarım həmin gün gəldi, amma rəis yoxdur bəhanəsi ilə görüş verilmədi. Geri qayıdıb ertəsi gün gəldilər, görüşdük.
Tam məlumatsızam, təcrid edilmişəm, məni sıxan budur.
- Sizin Qobustan həbsxanasına göndəriləcəyiniz haqda məlumat yayılıb. Səbəb kimi nizam-intizam qaydalarına riayət etməməyiniz və məhbuslar arasında dini təbliğat aparmağınız göstərilib. Məhbuslar arasında dini təbliğat aparırsınızmı? Saxlandığınız müəssisədə nəzarətçilərlə hansısa insidentiniz olubmu?
- Fevralın 1-dən – cəzaçəkmə müəssisəsinə gələn gündən karserdə saxlanıram. Mənə qarşı münasibət açıq-aşkar qərəzlidir. 12 kvadratmetr sahəsi olan qapalı bir otaqdır, məndən başqa bir nəfər saxlanır. Belə vəziyyətdə nə təbliğat aparmaq olar? Qondarma, saxta ittihamlarla şərlənib tutulmuşam, burada da eyni vəziyyət davam edir.
- İslamçıların prezident seçkisində iştirakı ilə bağlı nə düşünürsünüz?
- Azərbaycanda indiyə qədər demokratik seçkinin keçirilmədiyi hamıya məlumdur. Sabiq universitet rektoru Elşad Abdullayev də videoları ilə bunu sübut etdi. Xaricə kürü, pul, neft, qaz ötürməklə öz hakimiyyətlərini qoruyurlar. Deputat olmağa görə bir milyon verilirsə, prezident olmaq üçün milyardlar xərclənir.
İstənilən halda seçkidə iştirak etmək hər vətəndaşın borcudur, yalnız bu yolla taleyimizi dəyişə bilərik. Hamı əl-ələ verib seçki saxtakarlığının qarşısını almalı, 10 il əvvəl buraxılmış səhvləri təkrarlamamaq üçün mübarizə aparmalıdır. İslamçıların kimə səs verməsinə gəlincə, bu barədə yalnız namizədlərlə tanış olduqdan sonra fikir bildirə bilərəm. Amma korrupsiya, Hicab Qadağası, qanunsuz həbslər indiki iqtidara səs verməyə yer qoymur. İslamçılar, o cümlədən mən çıxışlarımızda həmişə ölkədə olan bütün qanunsuzluqları, haqsızlıqları, Qarabağ problemini, narkotiklə xalqı aludə etməni, digər problemləri önə çəkirik. Bütün qanunsuzluqlara qarşı mübarizə aparırıq və bu yolu tutan bütün təşkilatlarla bir yerdə olmağa hazırıq.
- İslamçıların seçkidə vahid qüvvə kimi çıxış etməsini təmin etmək üçün nə etmək lazımdır?
- İslam hərəkatının vahid siyasi qüvvəyə çevrilməsi üçün vahid lider olmalıdır. Ancaq bu gün özündə lider gücünü hiss edən bütün möminlər şərlənərək zindana atılıb. Bu addım hakimiyyətin qorxduğunu göstərir. Elə bu hərəkətləri ilə hökumət hərəkatın gec-tez vahid qüvvəyə çevrilməsinə təkan verir. Bütün liderlərin həyatları zindandan keçir.
- Müxalifətlə birlik deyəndə konkret hansı qüvvələri nəzərdə tutursunuz? Hansı qüvvələrlə birliyiniz mümkündür?
- Bu gün müxalifət vahid namizəd ətrafında birləşsə, islamçılar onlarla bir yerdə olar.
- Azərbaycan dindarlarını bir qayda olaraq İranla gizli əlaqələrdə suçlayırlar. Bu şübhə haradan qaynaqlanır?
- İslamçıları İranla gizli əlaqədə suçlamağı hökümət artıq uğursuz bir alətə çevirib. Bunu daim bir kart kimi əlində bayraq edir. Amma zindana təkcə islamçıları deyil, Qərb yönümlü şəxsləri də salırlar. Yəni hökümətin davası azad fikirli insanlara qarşıdır. Hökümət bəzən müxalifəti əsassız olaraq ermənipərəstlikdə ittiham etdiyi kimi bizi də bu cür ləkələyir.
Diqqət: Xəbərdən istifadə etdikdə mənbəyə istinad lazımdır