Əhli-Beyt (əleyhimus səlam) – Beynəlxalq Xəbər Agentliyi- ABNA: Bəhreyn şiələrinin dini lideri Şeyx İsa Qasim hakimiyyətin dini prizmadan uzaq yürütdüyü siyasətin mahiyyət etibarilə bütün din və məzhəblərlə qarşıdurmada olduğunu bildirib.
Şeyx İsa Qasim yaydığı bəyanatda qeyd edib ki, dünyəvi yanaşmaya əsaslanan belə siyasət İslam, xristianlıq, yəhudilik və digər dinlər, eləcə də şiə və sünni məzhəbləri arasında fərq qoymur.
Onun sözlərinə görə, bu siyasət zülmə qarşı çıxan və zalımlarla mübarizə aparan istənilən dini cərəyandan ehtiyat edir.
Şeyx İsa Qasim bildirib ki, belə siyasət şiə məzhəbinə qarşı mübarizə aparırsa, nəticə etibarilə sünni məzhəbinə qarşı da yönəlir. Eyni şəkildə, sünnilərə qarşı mübarizə aparıldıqda bu siyasət şiələrə qarşı da mübarizə aparmış olur.
O vurğulayıb ki, bunun əsas səbəbi konkret bir məzhəbə deyil, ümumilikdə İslama qarşı yönəlmiş münasibətdir.
Bəhreynli din xadimi insanların bu məsələdə iki qrupa bölündüyünü bildirib. Onun fikrincə, birinci qrupa vəziyyətdən xəbərdar olan, lakin dünyəvi maraqlarını dini dəyərlərindən üstün tutan insanlar daxildir. Bu şəxslər hansı məzhəbə mənsub olmalarından asılı olmayaraq mövcud siyasəti dəstəkləyir və onun tələblərinə uyğun hərəkət edirlər.
İkinci qrupa isə dünyəvi siyasətin üsul və məqsədlərindən xəbərsiz olan insanlar daxildir.
Şeyx İsa Qasim qeyd edib ki, belə insanlar öz məzhəblərindən fərqli dini və ya məzhəbi qrupların zəiflədilməsinə və ya aradan qaldırılmasına sevinə, hətta buna yardım edə bilərlər. Lakin onlar bununla təhlükənin sonradan özlərinə də yönələ biləcəyini nəzərə almırlar.
Sizin rəyiniz